Baba Goria Saboni Mwtai
By:Dr.Atul Debbarma, Category: General, Posted on:2009-10-29 07:52:58

Baba Goria mwtai saboni?
Tini achomsa tamungwi in` kok swhngna nangkha hinwi wansug baiyanw. Ang in` kok swhngma wngkha dolsa bororok salaio je Goria mutai sikam rokni mutai se, sikam hani tubuma se, bono chini baithang ni mutai hinwi surina kok kwrwi, bono surina yakarwi khibise rithai.
A kok khwnai ani bokhorok pingsa khai mihimwi thahngkha. Abo kukubui de hinwi saisung sakno ang swhngna nangkha, Sirisiti ni simi suriui phaimani baba Goria no, bisi burum bisi kwtal phainai bisi kaham kwrwng khai thahngna wngthu hinwi surijakma ni abode sikam rokni mutai tongmani?
Dolsa Tiprasa rok sak sakno belai sijakbaiwi sakni slai kwrwng tai kwrwi hinwi chongbai kha. Globalisation ni mung naui hating kotorma ni tomungno tai tongtharno swrwngna hinwi chango rikhui ongkhor baikha, hayung kotormani bororok bai gwdalna bagwi. Yangle Tiprasa rok sana thahngkhai tabuk phano suchi kongsa se takna rwngya khu. Globalisation ni bagwi hating kotormani joto bororokba bongni sirisitini tongtharno de swkang khibi ribaikha? Aboni bagwi jotoni puila swkang Tiprasa rok khaiba sirisitini simi suriui phaimani Tipra tongthar no rignai soroi khibima hai khai khibi rina ni fwrwngna chengkha. Tai aboni bagwi no in` bodol ni bororok thwih bai baksa sapuljak Goria mutai no bui sikamni hinwi awai khaina chengkha. Kosong tongnai Tiprasa rokni bwkha o chugli swgwi sakni tongtharni mutai baba Goria no selengma kariui hakchalo twiklek khibima jaga khibi rinanai kha tungsarikha.

A bodol rokni no masa mangnwi anobo hai hinwi sakhai ani bwkha bo wansukma fwnang rikha. Fia ang buini hai khai kosong kosong bongni kokno haino khe kubui hinwi gosiui naui manlia. Aboni ulo ang bijab rogo naitukna chengkha, tamo swijak tong chini kwcham bijab rogo a mutai ni mungwi. A bijab rokni kokrok nono ang oro kicha sukrubwi khursawanw.

Tipra ni laibuma Rajmala eba Bubagratang o swijak tongo, je Bugra Tipra/Tripur belai themrang, thenta tai fan gwnang tongmani. Bo kwbangma hasa (raijyo) ni bugra rokno mechenawi sak sakno jotoni kotoro bugra hinwi sakhlaikha. Abo simiya bo baithangno no mutai kwthang hinwi saklaiwi Tipra hasa ni lukurokno bongni sirisiti ni simi palai faimani, suriman mutai rokno khibirina dagikha. Tai joto bororokno bono surina bagwi sakha. Aboni ulo bugra Tipra mutai kotor Sibrai bai buthar paijagma yagulo Tipra hasa o oroi poroi nangna chengkha. Afuru no Tipra ni joto lukurok mutai kotoro Sibari no surifikha borogno bugra kaham masa rina bagwi. Bongni surima bai kha furjagwi mutai Sibrai borokno afuru dagikha je bohrok jefuru bongni sirisiti ni simi palai faimani Mutai chibrwi no suriui kha fur ri mannai afuru no Tipra hasa o isiri Hiraboti ni ogo chwla masa achai nai. Afuru isiri Hiraboti khabai khukbai in` mutai chibrwi rogno diyaiwi bongni kha no sepengwi mankha, tai bini ogo bugra Subrai achaikha.
Rajmala o o sirisiti ni simi palaijak mutai rokni mung wngkha, Hor, Uma, Hori, Ma. Bai, Kumar, Ganesh, Brahma, Prithibi, Ganga, Abdi, Agni, tai Kamesh.
Fia in` mwtwi ni mungrok swkang mohai sanskrit ni mung tongmaya, abo rajmala swinai rokbo gosima tongo. Kailash Chandra Singha bo a kokno no gosio. Amo le kwcharo Kokborok ni rajmala no Sanskrit o swlai furu se bongni kokbai gothokna twi khai mwtwi mung kwtalo swlai rimase. Tipra ni kwbangma itihasbid bo mo swlaijakma kokno gosio. Swkango mo mutai rok ni kokbork bai mung tongma wngkha, Mutaikotor eba Sibarai, Ama, Sangroma, Mailuma, Khuluma, Hachukma, Noksuma, Lampra, Goria, Kalia, Thumnairok, Bonirok, Akhata, tai Bikhita. Binoy Debbarma ni Kokborok kokrwbam o bo mutai chibrwi ni bising Goria masa tongo. Rajmala ni kokno cherwi naikhai chwng nugo je Tipra hasa ni lukurok siristi simi no kharchi mutai no suriui faimani. Tai a kharchi ni mutai chibrwi ni bising khoroksa wngkha baba Goria. Tai abo bo chwng rajmala o sai mano je bugra Subrai chama ni yagulo bo tai waisa haino hai mutai chibrwi no surina chengfikha, tabuk bo a mutai rok Tipra hawo surijak tongkhu.

Tipra ni khoroksa mwkhang kwchwng, sikuknai swikwrwng tai Tipra ni hukumu no twiwi kwbangma bijab swilangnai Alindralal Tripura Tipra tongthar no twiwi Tripur Sanghita mungwi bijab kansa swilangma tongo. A bijabo mwchang Tripura baba Goria ni achai kothoma khotolo Goria mutai bahai khai Tipra hawo suirjakna chengsakha abo no kaham khai fologwi swi kwlangkha.
A Goria ni achai kothoma o swijak tongma khai hai, borok ni bising jotoni swkang in` hawo achainai wngkha Dangaifa bai Dangaima. Salsa mutai sukundrai Dangaifano dagikha je bo bini hasa no bui kebennai kena nai rokni yakni mwthangna ma kwlainai. Afuru ochai kotor sukundrai no Dangaifa swhngkha bahaikhai? A kok swhngjak khai sukundrai bono sakha, Nwng chobao paina bagwi baba Goria no suridi, abo ani no tai kaisa mung,. Afuru a mutai bono bebak swbaiwi sakha, angno in` hayung ni jotoni slai kotor mutai Mutaikotor, angno waisa ba Burasa wngo, waisa kheba Subrai, waisa ba Kaleya, waisa ba Narasing, tai waisaba Goria. Mg.Tripura a bijbo Goria mutai no surimani raida bo sukrubwi swiwi kwlangkha.
Hai khai chwng Mg.Tripura ni bijabni koktwi bo nugo je Dangaifa Dangaima ni jora ni simi no baba Goria no Tiprasa rok choba tai hamkrai ni mutai hinwi suriui faimani. Tai a tongthar surima tabuk jora Tipra hawo kubwi wngwi palaijagwi tongkho.
In` kokrok no karwi Tipra hasa o haino luku rokni khuktwi kereng kothoma wnwgi chuchu bora ni simi kaisa khukni simi tai kaisa khugo khai kochogwi faimani tongo. A kothoma twi bo haino sajago. Salsa bugra Subrai ni buma Hiraboti twisao twi khokna hinwi thahng tongma jora bo khwnakha, Ama ama chengno mwthangdi hinwi chirik mokro wngwi kablai tongmani.

Afuru a kabama khwnai thahgnwi nugwi kha je borchuk bufang sakase mutai makchibrwi kakap kokop wngjak, yang tolao misib boira masa kotoroma borokno nasingwi rokojak. Bo afuru buji mankha je misibai se a mutai rok rifrikjagwi bufang saka kasai ma tongsio. Isiri Hiraboti logi logi no bini khajani risa khwngwi a misib boira ni saka finkhlai rikhai a misib jolima hamwi aroni kutulwi thahngkha. Afuru no Hirabati a mutai chibrwi no nogo tubui nukhung ni mutai hinwi mutai bokona chengkha. Aboni ulo Tipra bugra bosongni nukhung ni mutai chalangkha. In mutai chibwi ni bisingo khoroksa mutai wngkha baba Goria.
Hai khai tamungwi tabuk kok kwtal khai bachakha je baba Goria sikam rokni mutaise hinwi? A kok sana thahng khai kicha kolokmase. Chini bubrga rok swkang keboba buini kwpali keboba buini kechen tonglang mani. Wisaba Tipra hasa ni ari fuwarjagwi Gwnga twima nar jora sogwi kha, bufuru ba kuchuk ha sikam saka hwijak ma tongwi kha. Abo kubuino wngnai, tamo hinmale chwng nugo ha saka ni bosong kaisa fanose aswk kolok khai bugra chaui tonglang manya, jeswk khai Tipra ni bugrarok chalangkha. Belai khe sana thahngkhai bisi nwira swk chakhai no a bugra bosong kolowi ma thahngo. Abtwi wngwi Tipra hani bugra rok bo uram uram bongni bugra khor ma sehkha, kena rokni yakni sakno yohkna bagwi.

Rajmala ni twih chwng nugo Tipra hasa ni puila bugra khor tongmani Tribeg, ulo Dimasa eba hakwchar/Kasar bugra bai paiya wngwi Kholongmao sehwi ma faikha. Aroni simi sehwi tai waisa Rangamati/Udaipuro ma faikha, kwcharo thuruk bugra rok bai paiya wngwi Amarpuro bo bugra khor achukrima ni sai manjago. Paithago khai sehwi kwcham Aguli o faikha. Fia tabuk ni kwtal Aguli faimale bisi mwira swkse wngkhu.
Rajmala o swijak mo bugra khorno karwi bo taibo kwbangma jagawo Tipra ni bugrarok rajakhor khwlai langkha; aborok wngkha, Sambul Nagar, Ratasora, tai Thanangsi akorok. Thanangsi o je Tipra ni raja khor tonglang mani abo Rev. James Long ni Chronicles of Tripura o swijak tongo. Aro swihkha, in the city of Thanansi which was the capital of Tripura untill the Marauding expedition of the kukis caused it to be removed to some securer place.
Chwng jotono a kok saimano je baba Goria ni kaya eba mwkhang Thanangsi ni tubui faimani. Mo kokno no dolsa Tiprasa Goria mutai no sikam rokni hinwi tatal awaina chengkha. Kubui kok no chethroi naikhai nugo je Tipra ni bugra rok jefuru bo bui hani bugra bai chobawo kechen wngwi ma kharkha bohrog bonbni bosong ni mutai mutai chibrwi no logio twiwi kharkha. Sakni langma ni slai fano a bosong ni mutai no bohrok hamjagwi logi twifrewi kharkha. Abai no baksa baksa sawo je swkango mutai chibrwi ni kaya sakfang gwnang tongmasi wngna, fia chobao paiya wngwi ma kharfuru twithokya wngwi bokhrok simi tanwi twlangwi khahrfuru ni simi no a mutai chibrwi ni kaya mwkhang simi wngwi thahngo.

Thanangsi o rajakhor tongfuru no sikam rokbai choba o paiya wngwi ma kharfuru no Tipra ni bugrarok bongni mutai chibrwi ni bising Goria ni kaya no twlangwi khahrlang manlia, arono khibiwi ma kabukha. Ulo a Goria ni kaya no segwi nainani Tipra ni sipairok bisa katwisa choba ma rilaikha. Afuru joto Tiprasa kwthaui choba thahnglai kha. Jamatia, Riang, Debbarma, Halam, Noatia bebak sikam rokbai choba rikha. Tal char romwi choba rima ulo se sikamrok no mechenwi mansio. Afuru no Tipra sipaini sengkrak themrang dol Jamatia rok jotoni swkang a Goria ni kaya no segwi nakha tai afuru ni simi abo Jamatia dofani wngwi pujijagwi phaikha. A Goria mutai ni kaya no bugra Dhanyo Manikyo no rifaina nanglia tamo hinlame aswk sal kolokma romwi Goria ni kaya mutai chibrwi ni mutai nogo kwrwi wng tongsani yang bugra kwtal khai takri paikha. Je kaya manlia bohrok khai ba je jani ja manmani no Goria ni kaya chonogwi surina nangkha. Afuru no baksa ba kohl mankha, baksa ba trisul mankha, tai baksa ba wasok manwi faikha tai bisi brung bisi kwtalo baksa ba salsini tai baksa ba salsa ni bagwi baba Goria no suriui faikha.

Kokya ni kokno gosiui fano nakha je Goria mutai sikam rokni no tongmani. Hai khai no oro kwbangma swhngmung bachai faio. Tumung fano Tiprasa rok Goria no sikam rokni aroni tubui faikhai chwng tubui faima ulo sikam rok a Goria no suriui de tongfi kha. Sana thahngkhai khristan wngya sani swkang jora?
Eba khai ba Tiprasa rok tamungwi buini mutai no tubui surinai? Abotwi keboni tongtharo nukde nukjak? Tamo hinmale mutai no surima wngkha tongthar ni kok. Tamungwi Tiprasa rok ba buini mutai no segwi tubwi bono puitu krwitwtwi suriwi tongnai. Itihaso chwng nugo je thuruk bugra rok gilama Hindu rokni mutai ni kaya rokno sekproi twlang mani. Fia abono twlangwi bohrok kebo suriya, a kaya ni ranchakno takswbai nana bagwi simi se twlango.
Tai kaisa kok kasama nukjago, abo wngkha Goria mutai bai Ganesh no suhsalail mani. Tamo hinmale Goria bo maikhul rangri wngna bagwi tai Ganesh bo aboni bagwi no. Mo kokrok bo Tiprasa rok no lama juda funugwi kororina naimase. Sana thahngkhai joto dofani bororok ni mutai no kaham ni bagwi, kwplai wngna bagwi no. Ayang twih khai hayung kotorma ni joto dofani kaisaya kaisa mutai le tai dofa kaisa ni kaisaya kaisa mutai bai gwdalnai no. Hai hinwi a kainai mwtai thansa eba kaisa wngmanya. Goria no surima ni raida rok bebak Tiprasa rokni tai kubuni mutai rokno suritwi, tok, thakhum, pun, misib rok riui ochai suruio.

Soi kubui kokno sana thahngkhai Tiprasa sarok keboni tongtharno eba Hindu rokno swrwngma kwrwi. Ulta Hindu rokse sirisiti ni Tipra tongtharno swrwngkha. Tamo hinmale Babylon, Mesopotemia tai Judaism rogo mutai masa no se surima nukjago. Indo-aryan bosong bo aroni no bedek deksa, bodol kagwi bharot hawo habfaikha. Borok faifuru bongni logi bongni tongthar mutai khoroksa no surimani raida no tubui faimani. Fia ulo bharot hawo tongsoknai rokni tongthar no swrwngwi se bohrokbo kwbagnama mutai no surina chengo tai aboni mung sindu twima naro ehrmani hinwi Hindu mung laiwi thahngo. Ved ni bising jotoni kwcham rigvedo abai no mutai kotoro eba mung filjak Mahadev ni mung tai bini bwsarok gonesh, kartik, lokhi abtwi rokni mung kwrwi.

Abai no paithago sathai kwlailo baba Goria hamkrai tai choba ni mutai Tiprasa rokni sirisitini simi suri faimani baithang ni mutai se, sikam rokniya. Sakni tongthar no Tipra ha sakni huwi khibina nainai, buini wngwi samung tangnai dolsa rokni kokbai Danagaifa ni simi palai faimani mutai chibrwi ni khoroksa baba Goria no khibi ta ridi. Bisi burung no bisi kwtal o bono suhrina khatungja bai di. Haiya khai agi Tipra hasa ni bugra kwcham Agulini rajakhor no khibi kabui kwtal Aguli rajakhor swnama furu mutai chibrwi no tubui faiya wngma bai Tipra bugra bosong komol thahngtwi chini Tipra dofa bo komolwi thahnganw.


(Article Read 4451 times)
Tripura News